راولپنڈی، بدھ، 21 مئی 2025 (ڈبلیو این پی): بلوچستان کے ضلع خضدار میں بدھ کے روز اسکول کے بچوں کو لے جانے والی ایک بس کو بم حملے کا نشانہ بنایا گیا، جس کے نتیجے میں تین بچوں سمیت کم از کم پانچ افراد شہید جبکہ متعدد زخمی ہو گئے۔ پاک فوج کے شعبہ تعلقات عامہ (آئی ایس پی آر) نے اس افسوسناک واقعے کو بھارت کے حمایت یافتہ دہشتگردوں کی کارروائی قرار دیا ہے۔

آئی ایس پی آر نے ایک سخت بیان میں کہا کہ "ایک اور بزدلانہ اور دل دہلا دینے والے حملے میں دہشتگرد ریاست بھارت نے اپنے ایجنٹوں کے ذریعے خضدار میں معصوم اسکول کے بچوں کی بس کو نشانہ بنایا۔”

ابتدائی اطلاعات کے مطابق واقعے میں تین بچے اور دو بالغ افراد شہید ہوئے، جبکہ متعدد زخمی بچوں کو فوری طور پر اسپتال منتقل کر دیا گیا۔ ریسکیو ٹیمیں موقع پر پہنچ کر امدادی کارروائیوں میں مصروف ہو گئیں۔

آئی ایس پی آر کے مطابق یہ حملہ بھارت کی جانب سے میدان جنگ میں شکست کے بعد نرم اہداف کو نشانہ بنانے کی نئی حکمت عملی کا حصہ ہے۔ ترجمان نے کہا کہ "آپریشن بنیانِ مستور کے دوران دہشتگردوں کے ٹھکانوں پر کامیاب کارروائیوں کے بعد، بھارتی ایجنٹ معصوم شہریوں کو نشانہ بنا کر بلوچستان اور خیبرپختونخوا میں خوف اور بدامنی پھیلانا چاہتے ہیں۔”

بیان میں مزید کہا گیا کہ بچوں کو نشانہ بنانا بھارت کے ریاستی نظام کی اخلاقی پستی کا ثبوت ہے۔ "اس گھناؤنے بھارتی حمایت یافتہ حملے کے منصوبہ سازوں، سہولت کاروں اور مجرموں کو انصاف کے کٹہرے میں لایا جائے گا۔ بھارت کا مکروہ چہرہ دنیا کے سامنے بے نقاب کیا جائے گا۔”

پاک فوج نے اس عزم کا اعادہ کیا کہ پوری قوم کی حمایت سے ملک سے بھارتی سرپرستی میں ہونے والی دہشتگردی کو جڑ سے اکھاڑ پھینکا جائے گا۔

میر علی واقعہ پر آئی ایس پی آر کی وضاحت، الزامات کو مسترد، بھارتی سرپرستی میں فتنیہ الخوارج کو ذمہ دار قرار دے دیا

ایک اور پیش رفت میں آئی ایس پی آر نے 19 مئی کو شمالی وزیرستان کے علاقے میر علی میں پیش آنے والے واقعے پر وضاحت جاری کرتے ہوئے سیکورٹی فورسز پر لگائے گئے الزامات کو بے بنیاد اور من گھڑت قرار دیا ہے۔

بیان میں کہا گیا کہ "سولین ہلاکتوں کے افسوسناک واقعے کے بعد بعض حلقوں کی جانب سے سیکیورٹی اداروں کے خلاف جھوٹے الزامات پھیلائے جا رہے ہیں، جو ایک منظم گمراہ کن مہم کا حصہ ہیں۔”

آئی ایس پی آر کے مطابق، واقعے کی فوری تحقیقات کا آغاز کیا گیا، جس کے ابتدائی نتائج کے مطابق یہ کارروائی بھارتی سرپرستی میں کام کرنے والے دہشتگرد گروہ فتنیہ الخوارج نے کی۔

بیان میں کہا گیا کہ یہ دہشتگرد گروہ عام شہری آبادی کو ڈھال کے طور پر استعمال کرتے ہوئے سیکیورٹی فورسز اور عوام کے درمیان بداعتمادی پیدا کرنے کی کوشش کر رہا ہے۔

آئی ایس پی آر نے اس عزم کا اعادہ کیا کہ ذمہ دار عناصر کو قانون کے کٹہرے میں لایا جائے گا اور قوم و فوج مل کر دہشتگردی کے خاتمے کی جدوجہد جاری رکھیں گے۔

"ہم دشمن کے ہر ناپاک عزائم کو ناکام بنائیں گے اور پاکستان کے امن و اتحاد کو نقصان پہنچانے والے بیرونی عناصر کو ہر محاذ پر شکست دیں گے۔”