اسلام آباد، بدھ، 22 اکتوبر 2025 (ڈبلیو این پی): کنگ سلمان ہیومینیٹیرین ایڈ اینڈ ریلیف سینٹر (KSrelief) نے اسلام آباد میں ایک پروقار تقریب کے دوران "تقسیمِ کھجور پروگرام پاکستان 2025” کا باضابطہ آغاز کیا، جس کا مقصد ملک بھر کے مستحق اور کمزور طبقوں تک غذائی معاونت پہنچانا ہے۔

تقریب میں پاکستان میں سعودی عرب کے سفیر معالی نواف سعید بن المالکی نے منصوبے کا افتتاح کیا، جبکہ سینیٹر کیپٹن شاہین خالد بٹ، منیجنگ ڈائریکٹر پاکستان بیت المال نے مہمانِ خصوصی کے طور پر شرکت کی۔ اس موقع پر مختلف سرکاری اداروں، بین الاقوامی تنظیموں اور انسانی ہمدردی کے شراکت داروں کے نمائندے بھی موجود تھے۔

منصوبے کے تحت کنگ سلمان ریلیف سینٹر، پاکستان بیت المال کے تعاون سے پنجاب، سندھ، خیبرپختونخوا، بلوچستان، گلگت بلتستان، اور آزاد جموں و کشمیر میں اعلیٰ معیار کی سعودی کھجوریں تقسیم کرے گا۔ یہ اقدام ہزاروں مستحق اور معاشی مشکلات سے دوچار خاندانوں کو غذائی سہولت فراہم کرنے کے لیے کیا جا رہا ہے، خاص طور پر ان خاندانوں کے لیے جو سیلاب یا مالی بحران سے متاثر ہیں۔

اس موقع پر خطاب کرتے ہوئے سعودی سفیر نواف بن المالکی نے کہا کہ یہ منصوبہ سعودی عرب اور پاکستان کے درمیان دیرینہ دوستی، برادرانہ تعلقات، اور انسانیت پر مبنی شراکت داری کی عکاسی کرتا ہے۔ انہوں نے کہا کہ سعودی عرب ہمیشہ مشکل حالات میں پاکستان کے عوام کے ساتھ کھڑا رہا ہے، اور کنگ سلمان ریلیف سینٹر اس تعاون کو مزید مؤثر بنانے کے لیے مختلف منصوبے جاری رکھے ہوئے ہے۔

تقسیمِ کھجور پروگرام 2025 کنگ سلمان ریلیف سینٹر کی پاکستان میں جاری وسیع انسانی فلاحی سرگرمیوں کا ایک حصہ ہے۔ یہ سرگرمیاں غذائی تحفظ، صحت، تعلیم، پانی و صفائی، اور روزگار کے فروغ کے منصوبوں پر مشتمل ہیں، جو انسانیت کی خدمت اور پائیدار ترقی کے لیے سعودی عرب کے عزم کا مظہر ہیں۔

اپنے اختتامی کلمات میں سینیٹر کیپٹن شاہین خالد بٹ نے مملکتِ سعودی عرب اور کنگ سلمان ریلیف سینٹر کا شکریہ ادا کرتے ہوئے کہا کہ سعودی عرب ہمیشہ پاکستان کے عوام کے ساتھ ہمدردی اور تعاون کے جذبے سے پیش آیا ہے۔ انہوں نے اس عزم کا اظہار کیا کہ پاکستان بیت المال، کنگ سلمان ریلیف سینٹر کے ساتھ قریبی اشتراک میں یہ امداد ملک بھر کے سب سے زیادہ مستحق خاندانوں تک پہنچانے کے لیے ہر ممکن کوشش جاری رکھے گا۔