اسلام آباد، اتوار، 17 اگست 2025 (ڈبلیو این پی): اسلام آباد میں قائم انڈونیشیا کے سفارتخانے نے اتوار کو ملک کے 80ویں یومِ آزادی کی پروقار اور رنگا رنگ تقریب کا انعقاد کیا، جس میں انڈونیشیا کی ثقافت، اتحاد اور پاکستان کے ساتھ دوستی کو اجاگر کیا گیا۔

تقریب کی قیادت پاکستان میں انڈونیشیا کے نامزد سفیر چندرا وارسی نانتو سوکوجو نے کی، جبکہ خصوصی مہمانوں میں میجر جنرل (ر) اسروبودی اور انڈونیشین بگ وال ایکسپیڈیشن (IBEX) ٹیم کے چھ کوہ پیما شامل تھے جنہوں نے حال ہی میں گلگت بلتستان کے مشہور ٹرانگو ٹاور کی چوٹی سر کی۔

انڈونیشین شہریوں، سفارتخانے کے حکام، طلبہ، پیشہ ور افراد اور کمیونٹی کے اراکین نے سرخ و سفید ملبوسات اور روایتی لباس زیب تن کر شرکت کی، جو ’’تنوع میں یکجہتی‘‘ کے جذبے کی عکاسی تھی۔

سفیر چندرا نے اپنے خطاب میں تمام شرکا کا شکریہ ادا کرتے ہوئے پاکستان اور انڈونیشیا کے درمیان دوستی کے مضبوط رشتے کو سراہا۔ انہوں نے کہا، ’’آپ کی شمولیت انڈونیشیا کے لیے آپ کی محبت اور وابستگی کی عکاس ہے۔ پاکستان اور انڈونیشیا کی دوستی مزید مستحکم ہو، پاکستان-انڈونیشیا دوستی زندہ باد!‘‘

تقریب میں ثقافتی رنگ بھی نمایاں رہے، جن میں روایتی رقص، مختلف زبانوں میں نغمے، انکلونگ ساز کی دھنیں اور مارشل آرٹس کے مظاہرے شامل تھے۔ ان میں پاکستانی شراکت دار بھی شریک ہوئے، جس سے دونوں ممالک کے ثقافتی تعلقات مزید اجاگر ہوئے۔

انڈونیشین صدر کی خصوصی ہدایت پر سفیر چندرا نے پاکستان کے مختلف شہروں میں انڈونیشین کمیونٹی کی خواتین کوآرڈینیٹرز کو ان کی خدمات کے اعتراف میں اسناد پیش کیں، جبکہ جی اے کے ہیلتھ کیئر انٹرنیشنل کے تعاون سے مفت طبی معائنوں کا بھی اہتمام کیا گیا۔

تقریب کا ایک نمایاں پہلو IBEX ٹیم کی کامیابی کا اعتراف تھا، جس نے دنیا کی بلند ترین عمودی چوٹی ٹرانگو ٹاور (6,251 میٹر) سر کی۔ ٹیم لیڈر فریڈن سمبرنگ نے بتایا کہ ’’چوٹی پر ہم نے انڈونیشیا کا سرخ و سفید پرچم لہرایا اور 80ویں یوم آزادی اور پاکستان کے ساتھ 75 سالہ سفارتی تعلقات کے بینرز بھی آویزاں کیے۔‘‘

مہمانوں کی تواضع انڈونیشیا کے روایتی کھانوں اور مشروبات سے کی گئی، جس نے انڈونیشین ثقافت اور مہمان نوازی کا شاندار عکس پیش کیا۔

آخر میں سفیر چندرا نے تقریب کو کامیاب اور یادگار بنانے پر سفارتخانے کے عملے، شراکت داروں اور کمیونٹی اراکین کا شکریہ ادا کیا اور کہا کہ یہ تقریب انڈونیشیا کی وراثت اور پاکستان کے ساتھ دوستی کی حقیقی جھلک ہے۔