اسلام آباد، بدھ، 13 اگست 2025 (ڈبلیو این پی): اسلام آباد میں انڈونیشیا کے سفارتخانے نے پاکستان ریڈ کریسنٹ سوسائٹی (ہلالِ احمر) کے تعاون سے خون کے عطیات کا کیمپ منعقد کیا جس کا موضوع تھا ’’خون دیجئے، جان بچائیے‘‘۔ یہ تقریب انڈونیشیا کے 80ویں یوم آزادی اور پاکستان کے ساتھ 75 سالہ سفارتی تعلقات کی تقریبات کا حصہ تھی۔

تقریب کا افتتاح پاکستان میں انڈونیشیا کے نامزد سفیر چندرا ڈبلیو سوکوجو نے کیا۔ انہوں نے صدر انڈونیشیا کے پیغام کا حوالہ دیتے ہوئے کہا کہ اس برس یوم آزادی کی تقریبات سادگی مگر دوسروں کے لیے بامعنی انداز میں منائی جائیں۔ انہوں نے کہا، ’’خون کا عطیہ اس بات کی یاد دہانی ہے کہ عطیہ دہندگان معاشرے پر کتنا غیر معمولی اثر ڈالتے ہیں۔ آپ صرف خون نہیں دیتے بلکہ ضرورت مند مریضوں کو زندگی اور ان کے خاندانوں کو امید فراہم کرتے ہیں۔‘‘

تقریب میں چیئرپرسن ریڈ کریسنٹ سوسائٹی فرزانہ نیک، آسیان کے سفارتکار، اسلام آباد فورین ویمنز ایسوسی ایشن (IFWA) کی ارکان، انڈونیشین طلبہ اور پاکستانی رضاکار شریک ہوئے۔ فرزانہ نیک نے اپنے خطاب میں انڈونیشین سفارتخانے کی مسلسل انسانی ہمدردی کی کوششوں کو سراہا اور کہا کہ ’’ایسی عظیم مقصد کے لیے انڈونیشین سفارتخانے میں ہونا باعثِ اعزاز ہے۔‘‘

اس موقع پر انڈونیشین سفارتخانے اور ریڈ کریسنٹ سوسائٹی کے درمیان انسانی ہمدردی اور ہنگامی تعاون کے حوالے سے ایک معاہدہ بھی طے پایا۔ سفیر نے کہا کہ ’’یہ شراکت داری آئندہ مزید تعاون کے لیے نیا محرک ثابت ہوگی۔‘‘

شرکاء نے خون کے عطیہ مہم میں بھرپور دلچسپی کا اظہار کیا۔ انٹرنیشنل اسلامک یونیورسٹی اسلام آباد کے انڈونیشین طالب علم لِدزکری نے کہا، ’’میں نے پہلے کبھی خون عطیہ نہیں کیا تھا اور ڈرا ہوا تھا، لیکن اس بار ہمت کی۔ مجھے احساس ہوا کہ خون دینا نہ صرف میری صحت کے لیے اچھا ہے بلکہ دوسروں کی زندگیاں بھی بچاتا ہے۔‘‘

اس مہم میں ایتھوپیا، اریٹیریا، جنوبی افریقہ، فلپائن اور فرانس سے تعلق رکھنے والے غیر ملکی افراد نے بھی حصہ لیا، جن میں کئی نے پہلی مرتبہ خون عطیہ کیا۔

یہ اقدام انڈونیشین سفارتخانے کی انسانی ہمدردی کے جذبے اور پاکستان و انڈونیشیا کے درمیان عوامی روابط کو مزید مستحکم کرنے کا عکاس تھا۔