اسلام آباد، جمعہ، 20 جون 2025 (ڈبلیو این پی): سسٹین ایبل ڈیولپمنٹ پالیسی انسٹی ٹیوٹ SDPI اور ایئر یونیورسٹی AU اسلام آباد کے درمیان ایک مفاہمتی یادداشت MoU پر دستخط کیے گئے، جس کا مقصد پائیدار ترقی، پالیسی ریسرچ، علمی تبادلے اور ادارہ جاتی ترقی کے شعبوں میں اشتراک کو فروغ دینا ہے۔
مفاہمتی یادداشت پر ڈاکٹر شفقات منیر احمد، ڈپٹی ایگزیکٹو پالیسی SDPI، اور ائیر کوموڈور ریٹائرڈ فواد ظہیر، ڈائریکٹر آفس آف ریسرچ، انوویشن اینڈ کمرشلائزیشن ORIC ایئر یونیورسٹی نے دستخط کیے۔ یہ تقریب ایئر یونیورسٹی کے کیمپس میں منعقد ہوئی جس میں دونوں اداروں کے سینئر نمائندے شریک ہوئے۔
ایس ڈی پی آئی کے وفد میں معظم شریف بھٹی، ڈائریکٹر ایڈوکیسی اینڈ کیمپینز؛ احد نذیر، ایسوسی ایٹ ریسرچ فیلو؛ اور رمیلہ قمر، ایسوسی ایٹ مینیجنگ ایڈیٹر ریسرچ شامل تھے، جبکہ ایئر یونیورسٹی کی نمائندگی ڈاکٹر سلمان حسن خان، ڈائریکٹر کوالٹی انہانسمنٹ سیل QEC؛ ڈاکٹر سہیل اقبال، چیئر ڈیپارٹمنٹ DMAE؛ ڈاکٹر اسامہ قاضی، چیئر ڈیپارٹمنٹ GS؛ لیفٹیننٹ کرنل ریٹائرڈ عامر طور، ڈپٹی ڈائریکٹر QEC؛ مہرین اشتیاق، اسسٹنٹ ڈائریکٹر QEC؛ اور کنزہ ایاز نے کی۔
تقریب کا آغاز ایئر یونیورسٹی کی ایک دستاویزی فلم سے ہوا، جس میں یونیورسٹی کی تعلیمی اور تحقیقی کامیابیوں کو اجاگر کیا گیا۔ اس موقع پر ڈاکٹر سلمان حسن خان نے تعلیمی معیار اور ادارہ جاتی تعاون کے فروغ سے متعلق یونیورسٹی کے عزم کا اعادہ کیا۔
ڈاکٹر شفقات منیر نے شراکت داری کا خیرمقدم کرتے ہوئے کہا کہ SDPI، ایئر یونیورسٹی کے ساتھ مل کر شواہد پر مبنی پالیسی سازی اور پائیدار ترقی کو فروغ دینے کے لیے پرعزم ہے۔
مفاہمتی یادداشت کے تحت دونوں ادارے مشترکہ تحقیقی منصوبوں، تربیتی پروگراموں، فیکلٹی اور طلبہ کے تبادلے، پالیسی مکالموں اور صلاحیت سازی کی سرگرمیوں میں تعاون کریں گے۔
یہ اشتراک تعلیمی تحقیق اور پالیسی سازی کے درمیان موجود خلا کو پر کرنے کی ایک کوشش ہے، جس کے ذریعے مہارت، وسائل اور مؤثر معلومات کا تبادلہ ممکن بنایا جائے گا۔ دونوں اداروں نے اس اعتماد کا اظہار کیا کہ یہ تعاون پاکستان کی ترقی میں مثبت کردار ادا کرے گا، جس سے اختراعات، مدلل مکالمے اور جامع پالیسی سازی کو فروغ ملے گا۔
