راولپنڈی، ہفتہ، 3 مئی 2025 (ڈبلیو این پی): پاکستان نے ہفتہ کے روز مختصر فاصلے تک مار کرنے والے زمین سے زمین پر ہدف کو نشانہ بنانے والے "ابدالی ویپن سسٹم” کا کامیاب تربیتی تجربہ کیا، جو 450 کلومیٹر تک مار کرنے کی صلاحیت رکھتا ہے۔ یہ تجربہ "ایکسسرس انڈس” کے تحت کیا گیا، جو ملک کی اسٹریٹیجک دفاعی تیاریوں میں ایک اہم سنگِ میل قرار دیا جا رہا ہے۔
پاک فوج کے شعبہ تعلقاتِ عامہ (آئی ایس پی آر) کے مطابق، اس تجربے کا مقصد افواج کی عملی تیاری اور میزائل سسٹم کی تکنیکی صلاحیتوں کو جانچنا تھا، جن میں جدید نیویگیشن ٹیکنالوجی اور بہتر حرکات کی صلاحیت شامل ہے۔
تربیتی تجربے کے موقع پر آرمی اسٹریٹجک فورسز کمانڈ کے کمانڈر، اسٹریٹجک پلانز ڈویژن کے سینئر افسران، اور پاکستان کے دفاعی اداروں سے تعلق رکھنے والے اعلیٰ سائنسدان اور انجینئرز موجود تھے۔
صدر مملکت، وزیر اعظم، چیئرمین جوائنٹ چیفس آف اسٹاف کمیٹی اور تمام مسلح افواج کے سربراہان نے اس کامیاب تجربے پر تمام متعلقہ افسران اور اہلکاروں کو مبارکباد دی اور اس عزم کا اعادہ کیا کہ پاکستان کی اسٹریٹیجک فورسز ملکی خودمختاری کے دفاع اور قابلِ بھروسا ڈیٹرنس کو برقرار رکھنے کے لیے مکمل طور پر تیار ہیں۔
وفاقی وزیر داخلہ محسن نقوی نے اس تجربے کو پاکستان کے دفاعی سفر میں ایک "شاندار کامیابی” قرار دیا اور سائنسدانوں و انجینئرز کی بے مثال مہارت کو سراہا۔ اُن کا کہنا تھا، "یہ سنگِ میل ہماری بڑھتی ہوئی مقامی صلاحیتوں کا فخر انگیز مظہر ہے۔”
چیئرمین سینیٹ سید یوسف رضا گیلانی نے بھی اس کامیابی کو قوم کے لیے باعثِ فخر قرار دیتے ہوئے کہا، "یہ کامیابی قومی خودمختاری کے دفاع اور دفاعی صلاحیتوں کو بڑھانے کے ہمارے غیرمتزلزل عزم کا مظہر ہے۔”
پاکستان پیپلز پارٹی کے چیئرمین بلاول بھٹو زرداری نے بھی مسلح افواج، انجینئرز اور سائنسدانوں کو مبارکباد دی اور کہا کہ یہ تجربہ پاکستان کی مضبوط دفاعی صلاحیتوں کی علامت ہے۔ انہوں نے کہا، "ہم اپنے وطن کے بہادر محافظوں کو سلام پیش کرتے ہیں۔” ان کا مزید کہنا تھا کہ پاکستان کا میزائل اور جوہری پروگرام، جو شہید ذوالفقار علی بھٹو نے شروع کیا اور شہید محترمہ بینظیر بھٹو نے آگے بڑھایا، ملک کے ناقابلِ تسخیر دفاع کا ستون ہے۔
نائب وزیر اعظم اور وزیر خارجہ سینیٹر اسحاق ڈار نے بھی سوشل میڈیا پلیٹ فارم "ایکس” (سابقہ ٹوئٹر) پر اپنے پیغام میں مبارکباد پیش کرتے ہوئے کہا، "ابدالی ویپن سسٹم کے کامیاب تجربے پر سائنسدانوں، مسلح افواج اور قوم کو دل کی گہرائیوں سے مبارکباد۔ اللہ پاکستان کو مزید قوت، اتحاد اور رحمت عطا فرمائے۔”
اسپیکر قومی اسمبلی سردار ایاز صادق نے بھی اس کامیابی کو سراہتے ہوئے کہا کہ اس تجربے نے ملک کے دفاعی ڈھانچے کو مزید مضبوط کیا ہے۔ ان کا کہنا تھا، "ہماری مسلح افواج، سائنسدانوں اور انجینئرز کی محنت پاکستان کے دفاع کو محفوظ ہاتھوں میں رکھتی ہے۔ یہ سب ہمارے قومی ہیرو اور فخر کا باعث ہیں۔”
"ایکسسرس انڈس” کے تحت کیے گئے اس اسٹریٹیجک تجربے نے واضح کر دیا ہے کہ پاکستان اپنے دفاعی نظام کو جدید خطوط پر استوار کرنے اور خطے میں امن و استحکام کو یقینی بنانے کے لیے پرعزم ہے، اور یہ سب کچھ ایک قابلِ بھروسا دفاعی حکمتِ عملی کے تحت کیا جا رہا ہے۔
