اسلام آباد، جمعہ، 20 جون 2025 (ڈبلیو این پی): وزیر مملکت برائے مذہبی امور و بین المذاہب ہم آہنگی کیسو مل کھیال داس نے سینیٹ میں ہندو لڑکیوں کے حالیہ اغوا پر شدید تشویش کا اظہار کرتے ہوئے اقلیتوں کے حقوق کے تحفظ کے لیے فوری قانونی اصلاحات کا مطالبہ کیا ہے۔

ایوان بالا میں اقلیتی ارکان کی جانب سے معاملہ اٹھائے جانے پر، سینیٹ کے ڈپٹی چیئرمین کی ہدایت پر بات کرتے ہوئے کیسو مل نے بتایا کہ 18 جون کو ضلع سانگھڑ کے علاقے شہزادپور میں ایک ہی ہندو خاندان کی تین بیٹیوں اور ایک کزن کو اغوا کر لیا گیا۔

انہوں نے ایوان کو آگاہ کیا کہ واقعے کے فوراً بعد انہوں نے سندھ کے انسپکٹر جنرل پولیس، رکن قومی اسمبلی شازیہ عطا مری اور وزیراعلیٰ سندھ سے رابطہ کیا، جس کے نتیجے میں سندھ پولیس نے بروقت کارروائی کرتے ہوئے مغوی لڑکیوں کو بازیاب کروا لیا۔ "لڑکیوں کو حفاظتی تحویل میں رکھا گیا ہے، انہیں عدالت میں پیش کیا گیا جہاں ان کے بیانات دفعہ 164 کے تحت قلمبند کیے گئے،” انہوں نے بتایا۔

وزیر مملکت نے وفاقی وزیر قانون اعظم نذیر تارڑ اور وزیر داخلہ محسن نقوی سے اپیل کی کہ وہ انصاف کی فراہمی کو یقینی بنانے اور آئندہ ایسے واقعات کی روک تھام کے لیے فوری اقدامات کریں۔

"یہ صرف ایک خاندان کا المیہ نہیں بلکہ پاکستان کی بین الاقوامی ساکھ کا مسئلہ ہے۔ مخالف عناصر اس واقعے کو عالمی میڈیا میں پاکستان کو بدنام کرنے کے لیے استعمال کر رہے ہیں،” کھیال داس نے کہا۔

انہوں نے زور دیا کہ اسلام اور آئین پاکستان مذہبی جبر کی صریح مخالفت کرتے ہیں اور اس نوعیت کے واقعات نہ صرف اسلامی تعلیمات بلکہ ریاست کے بانی اصولوں کے بھی خلاف ہیں۔

ماضی کی کوششوں کا حوالہ دیتے ہوئے وزیر مملکت نے بتایا کہ 2020 میں اُس وقت کے وزیراعظم کی ہدایت پر اقلیتوں کے تحفظ کے لیے ایک پارلیمانی مشترکہ کمیٹی قائم کی گئی تھی جس کی سربراہی سینیٹر کاکڑ نے کی۔ تاہم انہوں نے افسوس کا اظہار کیا کہ بیرونی دباؤ کے باعث سندھ میں اقلیتوں کے تحفظ کا بل واپس لے لیا گیا، جسے پاکستان پیپلز پارٹی نے پیش کیا تھا۔

"ہمارا آئین مذہبی آزادی کی مکمل ضمانت دیتا ہے، پھر بھی ایسے گھناؤنے واقعات جاری ہیں۔ 12 یا 14 سال کی بچی کیسے اپنے مذہب کو چھوڑنے یا خاندان سے علیحدہ ہونے کا شعوری فیصلہ کر سکتی ہے؟ یہ واضح طور پر جبر ہے،” انہوں نے کہا۔

انہوں نے وفاقی وزیر قانون اعظم نذیر تارڑ کی کوششوں کو سراہا جنہوں نے اقلیتی کمیشن کو وزارت مذہبی امور سے نکال کر وزارت انسانی حقوق کے ماتحت لانے میں کامیابی حاصل کی۔ انہوں نے سینیٹر علی ظفر اور دیگر ارکان پارلیمنٹ کا بھی شکریہ ادا کیا جنہوں نے اقلیتوں کے حقوق کا بل منظور کرایا، جو اب صدر کی توثیق کا منتظر ہے۔

کھیال داس نے اقلیتی کمیشن کی فوری تشکیل کا مطالبہ کیا اور اسے ایسے انسانی حقوق کی خلاف ورزیوں سے نمٹنے کے لیے ایک ضروری ادارہ قرار دیا۔

"میری کمیونٹی سراپا احتجاج ہے۔ میں وزیر داخلہ سے اپیل کرتا ہوں کہ وہ فوری طور پر سندھ حکومت سے رابطہ کریں۔ فوری اقدام ناگزیر ہے—ورنہ میں اپنے لوگوں کا سامنا نہیں کر سکوں گا،” انہوں نے جذباتی انداز میں کہا۔

اختتام پر انہوں نے اس امید کا اظہار کیا کہ وزیراعظم شہباز شریف اور مسلم لیگ (ن) کے قائد نواز شریف کی بین المذاہب ہم آہنگی اور شہریوں کے مساوی تحفظ سے متعلق پالیسیوں کو عملی جامہ پہنایا جائے گا۔