اسلام آباد، جمعرات، 29 مئی 2025 (ڈبلیو این پی): پاکستان میں سویڈن کے سفارتخانے نے جمعرات کو اسلام آباد میں سویڈش رہائش گاہ پر ایک شاندار تقریب کے دوران سویڈن کا یومِ قومی اور پاکستان کے ساتھ سفارتی تعلقات کے 75 سال مکمل ہونے کی خوشی منائی۔

تقریب میں اعلیٰ سرکاری عہدیداران، کاروباری رہنماؤں، سول سوسائٹی کے نمائندوں اور مختلف ممالک کے سفارتی اہلکاروں نے شرکت کی، جس سے دونوں ممالک کے درمیان مضبوط اور متنوع تعلقات کا اظہار ہوا۔

اس موقع پر سفارتخانے نے "75 سالہ شراکت داری – سویڈن اور پاکستان” کے عنوان سے ایک یادگاری کتاب کا اجرا کیا اور اس کے ساتھ ایک مختصر کتابی نمائش کا بھی اہتمام کیا گیا۔ اس اشاعت میں دونوں ممالک کے درمیان سفارتی سفر، اہم سنگ میل اور پاکستان میں کام کرنے والی 40 سے زائد سویڈش کمپنیوں کے کردار کو اجاگر کیا گیا ہے۔

تقریب کے شرکاء نے مقامی فنکاروں کی جانب سے پیش کی گئی سویڈش موسیقی کی دلکش دھنوں سے بھی لطف اٹھایا، جس نے تقریب کو ایک خوشگوار اور یادگار رنگ دے دیا۔

پاکستان میں سویڈن کی سفیر الیگزینڈرا برگ وان لنڈے نے اس موقع پر خطاب کرتے ہوئے دوطرفہ تعلقات کی اہمیت پر روشنی ڈالی۔ اُنہوں نے کہا، "ہمارا مشترکہ سفر مختلف آوازوں کی ایک کہانی ہے۔” انہوں نے اس عزم کا اظہار کیا کہ سویڈن اور پاکستان کے تعلقات باہمی احترام اور مشترکہ اقدار پر مبنی ہیں اور مستقبل میں مزید مستحکم ہوں گے۔

وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے سویڈن کے ساتھ پاکستان کے دیرینہ تعاون کو سراہتے ہوئے کہا کہ دونوں ممالک بالخصوص ٹیکنالوجی، جدت اور پائیدار ترقی کے شعبوں میں قریبی شراکت دار ہیں۔ انہوں نے ڈیجیٹل ترقی اور معاشی شمولیت کے لیے تعاون کو مزید فروغ دینے کی خواہش کا اظہار کیا۔

سویڈش سفارتخانے نے تجارت، موسمیاتی تبدیلی، تعلیم، جدت اور صنفی مساوات جیسے شعبوں میں پاکستان کے ساتھ روابط مزید گہرا کرنے کے عزم کا اعادہ کیا، تاکہ یہ شراکت داری ایک مضبوط، متحرک اور مستقبل بَین تعلق میں تبدیل ہو سکے۔