آرمی چیف کا کمانڈ اینڈ اسٹاف کالج کوئٹہ کا دورہ، جارحیت اور دہشت گردی کے خلاف قومی عزم کو دُہرایا
راولپنڈی، جمعہ، 30 مئی 2025 (ڈبلیو این پی): چیف آف آرمی اسٹاف فیلڈ مارشل سید عاصم منیر نے جمعہ کے روز کمانڈ اینڈ اسٹاف کالج کوئٹہ کا دورہ کیا، جہاں انہوں نے زیرِ تربیت افسران اور فیکلٹی سے خطاب کرتے ہوئے پاکستان کے خلاف ہر قسم کی جارحیت اور دہشت گردی سے نمٹنے کے لیے قومی عزم کو ایک بار پھر دُہرایا۔
فیلڈ مارشل عاصم منیر نے آپریشن "بنیان مرصوص” کے شہداء کو خراجِ عقیدت پیش کیا اور ان کے اہل خانہ سے مکمل یکجہتی کا اظہار کیا۔ انہوں نے کہا کہ "قومی قیادت کی سرپرستی میں پاکستانی قوم مادرِ وطن کے دفاع کے لیے فولادی دیوار بن گئی۔”
آئی ایس پی آر کے مطابق، آرمی چیف نے پاک افواج کی پیشہ ورانہ مہارت اور قربانیوں کو سراہتے ہوئے "معرکۂ حق” کی کامیابی کو قومی اتحاد اور ریاستی طاقت کے تمام عناصر کی مکمل ہم آہنگی کا مظہر قرار دیا۔
علاقائی اور عالمی سیکیورٹی صورتحال پر تبصرہ کرتے ہوئے آرمی چیف نے بھارت کی جانب سے بلا اشتعال فوجی کارروائیوں کے بڑھتے رجحان پر شدید تشویش کا اظہار کرتے ہوئے اسے خطے کے امن کے لیے سنگین خطرہ قرار دیا۔ انہوں نے واضح کیا کہ پاکستان کو کسی صورت دباؤ میں نہیں لایا جا سکتا اور وہ مکمل صلاحیت رکھتا ہے کہ کسی بھی سطح کی جارحیت کا منہ توڑ جواب دے۔
انہوں نے خطے میں اسٹریٹجک استحکام کے لیے مسئلہ کشمیر کے پُرامن اور منصفانہ حل پر زور دیا، جو بین الاقوامی قوانین اور اقوام متحدہ کی قراردادوں کے مطابق ہونا چاہیے۔ انہوں نے بھارت کی جانب سے آبی جارحیت کو "غیرقانونی اور ناقابلِ قبول ہائیڈرو ٹیررازم” قرار دیا، جس سے خطے کا توازن متاثر ہو سکتا ہے۔
فیلڈ مارشل عاصم منیر نے پاکستان میں دہشت گردی کی سرپرستی میں بھارتی ریاست کے کردار کو اُجاگر کرتے ہوئے کہا کہ ملک گیر انسدادِ دہشت گردی مہم کو نئے عزم سے شروع کیا گیا ہے، جو اپنے منطقی انجام یعنی دہشت گردی کے ہر روپ کے مکمل خاتمے تک جاری رہے گی۔ انہوں نے قوم کے عزم اور حوصلے پر مکمل اعتماد کا اظہار کیا۔
زیرِ تربیت افسران سے خطاب کرتے ہوئے آرمی چیف نے کہا کہ مستقبل کے چیلنجز سے نمٹنے کے لیے قیادت میں عزم، جذبہ، اور جدتِ فکر ناگزیر ہیں۔ انہوں نے کہا، "تربیت صرف موجودہ تقاضوں کو ہی نہیں بلکہ مستقبل کے میدانِ جنگ کی تیاری کو بھی مدنظر رکھنی چاہیے، جو چُستی، اختراع اور پختہ ارادے کا متقاضی ہوگا۔”
انہوں نے کمانڈ اینڈ اسٹاف کالج کوئٹہ کو مستقبل کے عسکری رہنماؤں کی اعلیٰ تربیت اور فکری نشوونما کے لیے اہم کردار ادا کرنے پر سراہا۔
قبل ازیں کوئٹہ آمد پر فیلڈ مارشل عاصم منیر کا استقبال کمانڈر کوئٹہ کور اور کمانڈنٹ کمانڈ اینڈ اسٹاف کالج نے کیا۔
