یونائیٹڈ نیشنز، بدھ، 23 اپریل 2025 (ڈبلیو این پی): اقوام متحدہ نے خبردار کیا ہے کہ جنوبی غزہ میں جبری طور پر بے دخل کیے گئے خاندان شدید گرمی، گندے پانی، اور جگہ جگہ جمع کچرے کے باعث صحتِ عامہ کے ایک سنگین بحران کا سامنا کر رہے ہیں، جب کہ انسانی امداد کی ترسیل مسلسل رکی ہوئی ہے اور طبی سامان تیزی سے ختم ہوتا جا رہا ہے۔
اقوام متحدہ کے ادارہ برائے فلسطینی پناہ گزین (یو این آر ڈبلیو اے) کی سینئر ایمرجنسی آفیسر لوئیس واٹرج نے عالمی ادارے کی ویب سائٹ "یو این نیوز” کو بتایا کہ ساحلی علاقے الماوَسی میں عارضی خیمہ بستیوں میں پناہ لیے ہزاروں خاندان انتہائی خطرناک اور غیر انسانی حالات میں زندگی گزارنے پر مجبور ہیں۔
انہوں نے کہا، "کچرے کے ڈھیر قابو سے باہر ہو چکے ہیں۔ گندا پانی، چوہے، کیڑے مکوڑے، اور دیگر جانور لوگوں کے خیموں میں گھوم رہے ہیں۔ ان حالات میں بیماریاں تیزی سے پھیل رہی ہیں اور ادویات ناکافی ہیں۔”
واٹرج کے مطابق، اگرچہ یو این آر ڈبلیو اے کی صفائی کی مہم جاری ہے، لیکن وسائل تیزی سے ختم ہو رہے ہیں۔ "ہمارے پاس صرف دس دن کا جراثیم کش اسپرے باقی رہ گیا ہے،” انہوں نے خبردار کیا۔
صورتحال اس وقت مزید خراب ہو گئی جب اسرائیلی فضائی حملوں میں 21 اور 22 اپریل کے درمیان 30 سے زائد وہ گاڑیاں تباہ ہو گئیں جو کچرے کی صفائی، پانی کی فراہمی اور نکاسیٔ آب کے نظام کے لیے استعمال ہوتی تھیں، اقوام متحدہ کے ادارہ برائے انسانی امور (او سی ایچ اے) کے مطابق۔
گزشتہ ہفتے کم از کم 23 فضائی حملے ان خیمہ بستیوں پر ہوئے جہاں داخلی طور پر بے گھر فلسطینی پناہ لیے ہوئے تھے، جس کے نتیجے میں درجنوں شہری شہید ہو گئے، جن میں خواتین، بچے اور معذور افراد شامل تھے۔
او سی ایچ اے کے مطابق، غزہ کا نظامِ صحت تقریباً مفلوج ہو چکا ہے۔ بچ جانے والے طبی مراکز میں سے نصف سے زیادہ ان علاقوں میں ہیں جنہیں اسرائیل نے خالی کرنے کا حکم دے رکھا ہے، جس سے ضرورت مندوں کو بنیادی طبی امداد تک رسائی میں شدید مشکلات کا سامنا ہے۔ ادویات، طبی سامان اور عملے کی قلت بھی بدستور جاری ہے۔
15 اپریل تک، اندازاً 4 لاکھ 20 ہزار فلسطینی ایک بار پھر نقل مکانی پر مجبور ہو چکے ہیں — ان میں سے کئی افراد پہلے بھی بے گھر ہو چکے تھے۔
او سی ایچ اے کے مطابق، انسانی امداد کی رسائی تقریباً بند ہو چکی ہے۔ گزشتہ 52 دنوں سے غزہ میں کوئی امدادی قافلہ داخل نہیں ہو سکا۔ 15 سے 21 اپریل کے دوران طے شدہ 42 امدادی مشنز میں سے 20 کو اسرائیلی حکام نے روک دیا، 2 کو رکاوٹوں کا سامنا ہوا، 19 کو اجازت ملی، اور ایک منسوخ ہو گیا۔
دوسری جانب، فنڈز کی شدید کمی بھی امدادی کاموں میں بڑی رکاوٹ بنی ہوئی ہے۔ 22 اپریل تک اقوام متحدہ کی جانب سے مطلوبہ 4.07 ارب ڈالر میں سے صرف 569 ملین ڈالر — یعنی صرف 14 فیصد — فراہم کیے گئے ہیں، جو غزہ، مغربی کنارے، اور مشرقی یروشلم میں تین ملین افراد کی بنیادی ضروریات پوری کرنے کے لیے درکار ہیں۔
اقوام متحدہ کے عہدیداروں نے عالمی برادری سے ایک بار پھر اپیل کی ہے کہ وہ فوری طور پر حرکت میں آئے تاکہ مزید انسانی جانوں کے ضیاع کو روکا جا سکے اور محصور فلسطینی آبادی کو انسانی امداد تک رسائی یقینی بنائی جا سکے۔
