یونائیٹڈ نیشنز، بدھ، 23 اپریل 2025 (ڈبلیو این پی): اقوامِ متحدہ کے سیکریٹری جنرل انتونیو گوتریس نے مقبوضہ جموں و کشمیر میں ہونے والے مہلک حملے کی شدید مذمت کی ہے، جس میں منگل کے روز کم از کم 28 افراد جاں بحق ہو گئے۔

اقوامِ متحدہ کے ترجمان اسٹیفن دوجارک نے نیویارک میں یو این ہیڈکوارٹرز میں روزانہ کی پریس بریفنگ کے دوران سیکریٹری جنرل کی طرف سے مذمتی بیان جاری کیا۔ انہوں نے میڈیا رپورٹس کا حوالہ دیتے ہوئے بتایا کہ یہ حملہ پہلگام کے قریب پیش آیا، جہاں ایک مسلح شخص نے شہریوں کے ایک گروہ پر اندھا دھند فائرنگ کر دی۔

ترجمان کے مطابق، ’’سیکریٹری جنرل متاثرہ خاندانوں سے دلی ہمدردی اور تعزیت کا اظہار کرتے ہیں۔‘‘ دوجارک نے زور دیا کہ ’’شہریوں پر حملے کسی بھی صورت میں ناقابلِ قبول ہیں۔‘‘

ایک سوال کے جواب میں کہ آیا سیکریٹری جنرل کو اس حملے کے نتیجے میں خطے میں کشیدگی میں اضافے یا سرحد پار تنازع کے خدشات لاحق ہیں، دوجارک نے قیاس آرائی سے گریز کیا۔

انہوں نے کہا، ’’ہم ممکنہ نتائج کی پیش گوئی یا تجزیہ نہیں کریں گے۔ اس وقت ہماری توجہ اس ہولناک دہشتگرد حملے پر ہے جس میں 20 سے زائد افراد جان سے گئے، اور جس کی ہم سخت ترین الفاظ میں مذمت کرتے ہیں۔ باقی ماہرین بہتر طور پر اندازہ لگا سکتے ہیں کہ آیا اس سے کشیدگی میں اضافہ ہو سکتا ہے۔‘‘

تاحال کسی گروپ نے اس حملے کی ذمہ داری قبول نہیں کی ہے، تاہم اس واقعے نے بین الاقوامی سطح پر تشویش کی لہر دوڑا دی ہے اور خطے کی نازک سلامتی صورتحال پر ایک بار پھر سوالات اٹھا دیے ہیں۔