ڈاکار، بدھ، اپریل 23، 2025 (ڈبلیو این پی): سعودی عرب کے شاہ سلمان انسانی امداد و ریلیف مرکز (KSrelief) نے سینیگال میں بچوں کے لیے کوکلیئر امپلانٹ اور سمعی بحالی کی سہولیات فراہم کرنے کے لیے ’سعودی ہیئرنگ‘ کے عنوان سے ایک رضاکارانہ طبی پروگرام کا آغاز کر دیا ہے۔

بدھ کو KSrelief کی جانب سے جاری کردہ بیان کے مطابق، یہ پروگرام منصوبہ بندی و ترقی کے لیے ادارے کے اسسٹنٹ سپروائزر جنرل ڈاکٹر عقیل الغامدی نے باقاعدہ طور پر افتتاح کیا۔ افتتاحی تقریب میں متعدد اعلیٰ حکام نے شرکت کی، جبکہ پروگرام میں مختلف طبی شعبوں سے تعلق رکھنے والے 14 رضاکار شریک ہیں۔

’سعودی ہیئرنگ‘ پروگرام سعودی عرب کے عالمی انسانی مشن کا حصہ ہے، جو KSrelief کے ذریعے دنیا بھر کے پسماندہ طبقات کو طبی معاونت فراہم کرنے کے لیے شروع کیا گیا ہے۔ یہ اقدام ان افراد اور طبقات کی مدد کے لیے سعودی عرب کے مسلسل عزم کی عکاسی کرتا ہے جو بحرانوں اور مشکلات سے متاثر ہیں۔