اسلام آباد، پیر، اپریل 21، 2025ء (ڈبلیو این پی): پاکستان نے پیر کے روز پوپ فرانسس کے انتقال پر گہرے رنج و غم کا اظہار کرتے ہوئے انہیں عالمی امن، بین المذاہب مکالمے اور انسانی عظمت کے ایک بے لوث داعی اور معزز روحانی رہنما قرار دیا۔

وزارت خارجہ کی جانب سے جاری ایک بیان میں کہا گیا کہ پوپ فرانسس نے دنیا کے مذاہب میں ہم آہنگی کو فروغ دینے، مظلوموں کے حقوق کے لیے آواز اٹھانے اور انسانیت کے وقار کی پاسداری کے لیے غیر متزلزل عزم کا مظاہرہ کیا۔

بیان میں مزید کہا گیا کہ پاکستان پوپ فرانسس کی ان تھک کوششوں کو انتہائی قدر کی نگاہ سے دیکھتا ہے، جن کا مقصد مختلف ثقافتوں اور مذاہب کے درمیان باہمی احترام اور افہام و تفہیم کو فروغ دینا تھا۔

وزارت خارجہ نے ان کے تابندہ ورثے کو خراج عقیدت پیش کرتے ہوئے کہا کہ پوپ فرانسس کی زندگی عاجزی، بے لوث خدمت اور بنی نوع انسان کے اتحاد کے عزم سے عبارت رہی۔ "ان کی خدمات آنے والی نسلوں کے لیے مشعل راہ بنی رہیں گی۔”

پاکستان نے اس موقع پر عالمی کیتھولک برادری اور دنیا بھر میں پوپ فرانسس کی زندگی سے متاثر ہونے والے تمام افراد سے یکجہتی کا اظہار کیا۔