اسلام آباد، جمعرات، 23 اکتوبر 2025 (ڈبلیو این پی): پاکستان نے خطرے سے دوچار برفانی چیتے اور اس کے نازک پہاڑی ماحولیاتی نظام کے تحفظ کے لیے اپنے عزم کا ایک بار پھر اعادہ کیا ہے، جب کہ دنیا بھر میں جمعرات کو بین الاقوامی یومِ برفانی چیتا منایا گیا۔
وزارتِ ماحولیاتی تبدیلی و ماحولیاتی ہم آہنگی (MoCC&EC) کی جانب سے جاری بیان میں کہا گیا کہ حکومت اس نایاب اور پوشیدہ جانور—جسے اکثر ’’پہاڑوں کا بھوت‘‘ کہا جاتا ہے—کے تحفظ کے لیے پہاڑی برادریوں، سائنس دانوں اور ماحولیاتی تنظیموں کے ساتھ قریبی اشتراک جاری رکھے گی۔
وزارت کے ترجمان اور جنگلی حیات کے تحفظ کے ماہر محمد سلیم شیخ نے کہا: پہاڑی برادریوں، سائنس دانوں اور عالمی شراکت داروں کے تعاون سے پاکستان پُرعزم ہے کہ برفانی چیتا ہمارے بلند و بالا پہاڑوں میں بقا، توازن اور فطری استقامت کی علامت کے طور پر ہمیشہ قائم رہے۔
ہر سال 23 اکتوبر کو منایا جانے والا بین الاقوامی یومِ برفانی چیتا اس بار ’’مستقبل کی نسلوں کے لیے برفانی چیتے کے مساکن کا تحفظ‘‘ کے موضوع کے تحت منایا گیا، جس کا مقصد اس خطرے سے دوچار نسل کے تحفظ کے لیے شعور اجاگر کرنا اور عالمی سطح پر عملی اقدامات کو فروغ دینا ہے۔
عالمی اندازوں کے مطابق دنیا بھر میں 3,500 سے 7,000 برفانی چیتے باقی رہ گئے ہیں جو وسطی اور جنوبی ایشیا کے 12 ممالک، بشمول پاکستان، بھارت، چین اور افغانستان کے بلند پہاڑی سلسلوں میں پائے جاتے ہیں۔ ماہرین کے مطابق ان کی بقا کے لیے علاقائی تعاون، مشترکہ تحقیق، اعداد و شمار کے تبادلے اور غیر قانونی شکار کے خلاف مربوط حکمتِ عملی انتہائی ناگزیر ہے۔
پاکستان میں برفانی چیتے 80,000 مربع کلومیٹر سے زائد رقبے پر مشتمل ہندوکش، قراقرم، پامیر اور ہمالیہ کے پہاڑی سلسلوں میں پائے جاتے ہیں، خصوصاً گلگت بلتستان اور شمالی خیبرپختونخوا میں۔ ایک حالیہ قومی سروے کے مطابق پاکستان میں ان کی تعداد تقریباً 167 ہے، جو مستقبل کی منصوبہ بندی کے لیے ایک اہم سائنسی بنیاد فراہم کرتی ہے۔
پاکستان گلوبل اسنو لیپرڈ اینڈ ایکوسسٹم پروٹیکشن پروگرام (GSLEP) کا فعال رکن بھی ہے، جو 12 ممالک پر مشتمل ایک علاقائی اتحاد ہے جو برفانی چیتے کے مساکن کے تحفظ اور ایشیا کے بلند پہاڑی علاقوں میں پائیدار ترقی کو فروغ دینے پر کام کر رہا ہے۔
محمد سلیم شیخ کے مطابق بڑھتا ہوا درجہ حرارت، گلیشیئرز کا پگھلنا اور نباتات کے بدلتے ہوئے پیٹرن برفانی چیتے کے قدرتی مسکن کو تیزی سے محدود کر رہے ہیں۔
انہوں نے خبردار کیا کہ زیادہ چرائی، شکار کی کمی، غیر قانونی شکار اور بدلہ لینے کی کارروائیاں تحفظ کی کوششوں کو کمزور کر رہی ہیں۔
انہوں نے مزید کہا کہ تعمیراتی منصوبے، کان کنی اور بے قابو سیاحت نے ان کے رہائشی علاقوں کو ٹکڑوں میں تقسیم کر دیا ہے، جب کہ موسمیاتی تبدیلی کے باعث یہ جانور انسانی آبادیوں کے قریب آ رہے ہیں، جس سے تنازعات اور غیر قانونی شکار کے خطرات بڑھ رہے ہیں۔
شیخ نے کہا کہ برفانی چیتے کا تحفظ صرف مادی اقدامات سے ممکن نہیں بلکہ مقامی آبادی میں شعور و آگاہی مہمات بھی ناگزیر ہیں۔
پہاڑی علاقوں میں آگاہی پروگرام، مویشی بیمہ اسکیمیں، شکار سے محفوظ باڑ والے باڑے، اور کمیونٹی پر مبنی ایکو ٹورازم ایسے اقدامات ہیں جو انسان اور جنگلی حیات کے درمیان بقائے باہمی کو فروغ دے سکتے ہیں، انہوں نے کہا۔
وزارت کے زیرِ اہتمام نیشنل اسنو لیپرڈ اینڈ ایکوسسٹم پروٹیکشن پروگرام کے تحت گلگت بلتستان اور چترال میں مقامی برادریوں کے اشتراک سے متعدد منصوبے جاری ہیں جو چرواہوں کو معاوضہ اور متبادل روزگار کے مواقع فراہم کر کے انسانی و حیوانی تنازعات میں کمی لا رہے ہیں۔
وزارت نے صوبائی وائلڈ لائف محکموں کے تعاون سے تحقیقی و مانیٹرنگ سرگرمیوں کو وسعت دی ہے، جب کہ نوجوانوں میں آگاہی مہمات اور سرحد پار جنگلی حیات کے راستوں کے تحفظ کے لیے بھی اقدامات کیے جا رہے ہیں۔
شیخ کے مطابق: یہ پروگرام مثبت نتائج دے رہے ہیں جن سے تنازعات میں کمی اور اہم مساکن کی نگرانی بہتر ہوئی ہے۔
انہوں نے اس عزم کا اظہار کیا کہ برفانی چیتے کے تحفظ کے لیے مستقل مزاجی، مؤثر قانون نافذگی، ذمہ دار سیاحت اور بلند پہاڑی علاقوں میں موسمیاتی لحاظ سے پائیدار ترقی کو قومی ترجیحات میں شامل رکھنا ضروری ہے۔
شیخ نے کہا کہ پاکستان کا یہ نیا عزم اس بات کا مظہر ہے کہ حیاتیاتی تنوع کا تحفظ اور موسمیاتی استقامت پائیدار قومی ترقی کے لیے ناگزیر عناصر ہیں۔
