مکہ، منگل، 24 جون 2025 (ڈبلیو این پی): مکہ مکرمہ میں سعودی طبی عملے کی بروقت کارروائی اور جدید طبی سہولیات کی بدولت ایک 42 سالہ پاکستانی حاجی کو نئی زندگی مل گئی، جس کا دل حج کے دوران پانچ بار بند ہو گیا تھا۔
مکہ ہیلتھ کلسٹر کے مطابق، حاجی کو اچانک دل کا دورہ پڑنے پر مشرقی عرفات کے اسپتال منتقل کیا گیا، جہاں اس کا دل متعدد بار دھڑکنا بند کر گیا، اور اس کی حالت نہایت تشویشناک ہو گئی۔ ابتدائی طبی امداد کے بعد، مریض کو ECMO (ایکسٹرا کارپوریئل میمبرین آکسیجینیشن) مشین پر منتقل کیا گیا تاکہ اس کے جسم کے اہم اعضاء کی کارکردگی کو برقرار رکھا جا سکے۔
بعد ازاں، حاجی کو ایئر ایمبولینس کے ذریعے کنگ عبداللہ میڈیکل سٹی منتقل کیا گیا، جہاں وہ وینٹی لیٹر پر غیر مستحکم حالت میں تھا۔ وہاں پہنچتے ہی ماہرین کی ٹیم نے فوری انجیوپلاسٹی کرتے ہوئے دل کی بند شریانیں کھولیں، اور دل کے پمپنگ نظام کو سہارا دینے کے لیے "امپیلا” نامی جدید آلہ نصب کیا گیا تاکہ خون کی روانی برقرار رہے اور دل پر دباؤ کم ہو۔
مکمل علاجی منصوبے میں دل کی ناکامی اور نمونیا جیسے پیچیدہ مسائل کا بھی احاطہ کیا گیا۔ وقت گزرنے کے ساتھ مریض کی حالت میں بتدریج بہتری آئی، یہاں تک کہ اسے وینٹی لیٹر اور ECMO مشین سے ہٹا دیا گیا، اور اس نے مکمل ہوش میں آ کر خود سانس لینا شروع کر دیا۔
17 جون کو، معالجین کی ٹیم نے مریض کی مکمل صحتیابی کا اعلان کیا، اور بتایا کہ وہ اب بحالی کے مرحلے میں ہے اور مکمل شعور کے ساتھ زندگی کی طرف لوٹ چکا ہے۔
یہ واقعہ سعودی عرب کے جدید طبی نظام، مہارت اور حج کے دوران ضیوف الرحمن کو فراہم کی جانے والی اعلیٰ ترین طبی سہولیات کا منہ بولتا ثبوت ہے، جو نہ صرف زندگی بچاتے ہیں بلکہ مایوسی کو امید اور بیماری کو شفا میں بدل دیتے ہیں۔
