نیویارک، جمعرات، 19 جون 2025 (ڈبلیو این پی): چیف آف آرمی اسٹاف فیلڈ مارشل سید عاصم منیر، نشانِ امتیاز (ملٹری) نے اقوام متحدہ میں پاکستان کے مستقل مشن کی بصارت سے محروم سفارتکار سائمہ سلیم سے ملاقات کی اور ان کی عالمی سطح پر پاکستان کے مؤقف کے مؤثر دفاع اور سفارتی خدمات کو زبردست خراجِ تحسین پیش کیا۔

آرمی چیف نے سائمہ سلیم کی غیر معمولی صلاحیتوں، علمی فہم و بصیرت اور پاکستان کے قومی مفادات کے فروغ کے لیے ان کی انتھک محنت کو سراہا۔ انہوں نے کہا کہ سائمہ سلیم نہ صرف پاکستان بلکہ خصوصی افراد کے لیے بھی ایک روشن مثال ہیں جو ہمت، عزم اور جذبے سے ہر رکاوٹ کو عبور کر کے کامیابی کی نئی راہیں ہموار کر رہی ہیں۔

جنرل عاصم منیر نے یقین دہانی کرائی کہ پاک فوج ملک میں خصوصی افراد کی شمولیت اور خودمختاری کے فروغ کے لیے پرعزم ہے تاکہ وہ بھی قومی ترقی میں اپنا کردار ادا کر سکیں۔

ملاقات کے دوران سائمہ سلیم نے اقوام متحدہ میں اپنی سفارتی سرگرمیوں اور پاکستان کو درپیش چیلنجز سے متعلق بریفنگ دی۔ انہوں نے خاص طور پر بھارت کی ریاستی سرپرستی میں ہونے والی دہشت گردی کو خطے میں عدم استحکام کی بنیادی وجہ قرار دیا۔

آرمی چیف نے عالمی فورمز پر پاکستان کے مؤقف کو مدلل انداز میں اجاگر کرنے پر سائمہ سلیم کی کاوشوں کو سراہا اور پاکستان مخالف بیانیے کا مؤثر جواب دینے پر ان کی جرات اور فہم کو خراجِ تحسین پیش کیا۔

اس موقع پر سائمہ سلیم نے اپنا ادبی کام بھی آرمی چیف کو پیش کیا جسے انہوں نے بے حد سراہا۔

یہ ملاقات اس حقیقت کا مظہر ہے کہ پاکستانی قوم میں موجود غیر معمولی صلاحیتیں، خواہ کسی بھی جسمانی رکاوٹ کا سامنا کیوں نہ ہو، نہ صرف ملک کے لیے باعثِ فخر ہیں بلکہ آنے والی نسلوں کے لیے بھی مشعلِ راہ ہیں۔