اسلام آباد، منگل، 20 مئی 2025 (ڈبلیو این پی): صدر مملکت آصف علی زرداری نے منگل کے روز پاکستان اور تھائی لینڈ، فلپائن، سلووینیا، سربیا، برکینا فاسو، زیمبیا اور لٹویا کے درمیان تجارت، معیشت اور ثقافت کے شعبوں میں دوطرفہ تعاون کو مزید فروغ دینے کی ضرورت پر زور دیا ہے۔

صدر نے یہ بات ایوان صدر میں ہونے والی اسناد پیش کرنے کی ایک تقریب کے دوران کہی، جس میں ان سات ممالک کے نئے تعینات اور غیر مقیم سفراء نے اپنی سفارتی اسناد صدر مملکت کو پیش کیں۔

اسناد پیش کرنے والوں میں تھائی لینڈ کے رونگ وُدھی ویرا بُتر، فلپائن کے ڈاکٹر ایمانوئل آر فرنانڈیز، سلووینیا کے ایگور یوکچ، سربیا کے دامیر کووایچووچ، برکینا فاسو کے محمادی کابورے، زیمبیا کے ایوان زیولو اور لٹویا کی دانا گولڈفِنکا شامل تھیں۔ مسلح افواج کے چاق و چوبند دستے نے معزز مہمانوں کو گارڈ آف آنر پیش کیا۔

صدر زرداری نے سفراء کو نئی ذمہ داریاں سنبھالنے پر مبارکباد دی اور امید ظاہر کی کہ ان کے دور میں دوطرفہ تعلقات میں مزید وسعت آئے گی۔ انہوں نے کہا کہ پاکستان عالمی شراکت داری کو فروغ دینے کے لیے تجارتی و کاروباری روابط کو مضبوط بنانے کا خواہاں ہے۔

صدر مملکت کو عوامی شکایات اور مالیاتی نگرانی سے متعلق رپورٹس پیش

علاوہ ازیں صدر مملکت سے بینکنگ محتسب سراج الدین عزیز نے ملاقات کی اور سال 2024 کی سالانہ رپورٹ پیش کی۔ رپورٹ کے مطابق گزشتہ برس بینکنگ صارفین کو 1.65 ارب روپے کا ریلیف فراہم کیا گیا، جبکہ کمرشل بینکوں کے خلاف موصول ہونے والی 27 ہزار سے زائد شکایات کو حل کیا گیا۔

صدر نے محتسب کے کردار کو سراہا اور عوامی شکایات کے بروقت ازالے کے لیے مکمل تعاون کی یقین دہانی کرائی۔

بعد ازاں، آڈیٹر جنرل پاکستان محمد اجمل گوندل نے صدر مملکت سے ملاقات کی اور وفاقی حکومت کے کھاتوں پر مشتمل آڈٹ رپورٹ پیش کی، جس سے ریاستی مالیاتی شفافیت اور نگرانی کو مزید تقویت ملی ہے۔