اسلام آباد، پیر، 5 مئی 2025 (ڈبلیو این پی): اقوامِ متحدہ کے سیکریٹری جنرل انتونیو گوتریس نے پیر کے روز وزیر اعظم محمد شہباز شریف سے ٹیلیفونک رابطہ کیا جس میں جنوبی ایشیا کی بدلتی ہوئی سیکیورٹی صورتحال پر گفتگو کی گئی۔ یہ ایک ہفتے کے دوران دونوں رہنماؤں کے درمیان دوسرا رابطہ تھا۔

وزیراعظم ہاؤس سے جاری بیان کے مطابق وزیر اعظم شہباز شریف نے اقوام متحدہ کے سربراہ کی مسلسل سفارتی کوششوں اور روابط کو سراہا اور خطے میں کشیدگی کے خاتمے اور ٹکراؤ سے گریز کی ان کی اپیل کا خیرمقدم کیا۔

گفتگو کے دوران وزیر اعظم نے حالیہ پہلگام واقعے پر پاکستان کی جانب سے ایک آزاد، شفاف، غیر جانبدار اور قابلِ اعتماد بین الاقوامی تحقیقات کی پیشکش کا اعادہ کیا۔ انہوں نے اس پر تشویش ظاہر کی کہ بھارت نے تاحال کوئی ثبوت فراہم نہیں کیا، اس کے باوجود وہ اشتعال انگیز بیانات اور جنگی جنون میں مبتلا ہے۔

وزیر اعظم نے اس عزم کو دہرایا کہ پاکستان اپنی خودمختاری اور علاقائی سالمیت کے تحفظ کے لیے پرعزم ہے۔

انہوں نے بھارت کی جانب سے بین الاقوامی مالیاتی اداروں کو سیاسی مقاصد کے لیے استعمال کرنے اور پاکستان کے معاشی مفادات کو نقصان پہنچانے کی کوششوں پر بھی شدید تحفظات کا اظہار کیا۔

اقوام متحدہ کے سیکریٹری جنرل گوتریس نے وزیر اعظم کو اپنے جاری سفارتی اقدامات سے آگاہ کیا جن کا مقصد خطے میں امن و استحکام کو فروغ دینا ہے۔ انہوں نے تمام متعلقہ فریقین سے روابط جاری رکھنے کی یقین دہانی کرائی تاکہ کشیدگی کو کم کیا جا سکے اور مذاکرات کو فروغ دیا جا سکے۔

یہ رابطہ ایسے وقت میں ہوا ہے جب جنوبی ایشیا کے جوہری صلاحیت کے حامل ہمسایہ ممالک کے درمیان بڑھتی ہوئی کشیدگی کے پیش نظر علاقائی و عالمی سفارتی سرگرمیوں میں تیزی دیکھی جا رہی ہے۔