ریاض، اتوار، 27 اپریل 2025 (ڈبلیو این پی): سعودی عرب کے وزیر اطلاعات سلمان بن یوسف الدوسری نے اتوار کے روز "یئر آف امپیکٹ” پروگرام کے تحت ایک نئے میڈیا ڈائیلاگ انیشیٹو کا آغاز کر دیا، جس کا مقصد میڈیا سے وابستہ پیشہ ور افراد کے لیے پائیدار رابطے اور تعاون کا پلیٹ فارم قائم کرنا ہے۔
اس اقدام کا مقصد میڈیا کے شعبے میں ترقی کے مواقع کو اجاگر کرنا، انڈسٹری کو درپیش چیلنجز کا حل تلاش کرنا، سرکاری اداروں، نجی شعبے اور انفرادی شخصیات کے مابین مقامی شراکت داری کو مضبوط بنانا، اور علم و مہارت کے تبادلے کو فروغ دینا ہے تاکہ مملکت میں میڈیا اور ابلاغ کے شعبے کو مزید ترقی دی جا سکے۔
اس پروگرام کے تحت وزیر اطلاعات اور مختلف میڈیا ماہرین کے درمیان باقاعدہ ملاقاتوں کا انعقاد کیا جائے گا، جن میں پوڈ کاسٹ تخلیق کار، ٹاک شو میزبان، گیمنگ مواد بنانے والے، سوشل میڈیا اکاؤنٹ منیجرز، میڈیا کمپنیوں کے عہدیدار، کھیلوں کے تبصرہ نگار، یوٹیوب تخلیق کار، پروڈیوسرز، ہدایتکار، کالم نگار اور صحافی شامل ہوں گے۔
اس انیشیٹو کی افتتاحی نشست ریاض کے "دی اسٹیج” تھیٹر میں منعقد ہوئی، جس میں وزیر اطلاعات، میڈیا اداروں کے سربراہان اور 30 سے زائد پوڈ کاسٹ ماہرین نے شرکت کی۔ اس موقع پر میڈیا منصوبوں اور اقدامات کی تفصیلات پیش کی گئیں، خصوصاً سعودی عرب میں تیزی سے ترقی کرتے پوڈ کاسٹنگ کے شعبے اور جنرل اتھارٹی آف میڈیا ریگولیشن کی خدمات اور اعدادوشمار پر روشنی ڈالی گئی۔
نشست کے دوران وزیر اطلاعات نے سعودی میڈیا اکیڈمی کی جانب سے پوڈ کاسٹ تخلیق کاروں کے لیے دو نئی پہل کاریوں (انیشیٹوز) کا اعلان بھی کیا۔ پہلے انیشیٹو کے تحت ابتدائی سطح کے پوڈ کاسٹرز کو پیشکش، ایڈیٹنگ، مواد کی تیاری، لائٹنگ، آڈیو انجینئرنگ، کاروباری حکمت عملی اور مارکیٹنگ جیسے شعبوں میں تربیت فراہم کی جائے گی۔ دوسرا انیشیٹو تجربہ کار پوڈ کاسٹرز کے لیے ہے، جس کے تحت انہیں مقامی اور بین الاقوامی اداروں کے تعاون سے مہارت میں مزید نکھار کے مواقع فراہم کیے جائیں گے۔
شرکاء نے اس اقدام کا خیرمقدم کرتے ہوئے اسے پیشہ ورانہ تعلقات کو مضبوط بنانے، خیالات اور تجربات کے تبادلے کو فروغ دینے، اور سعودی میڈیا کے مستقبل پر تعمیری مکالمہ کرنے کے لیے ایک اہم فورم قرار دیا۔
