شوشہ، جمعرات، 3 جولائی 2025 (ڈبلیو این پی): وزیراعظم محمد شہباز شریف جمعرات کے روز آذربائیجان کے نگورنو کاراباخ خطے کے تاریخی شہر شوشہ پہنچے، جہاں وہ اقتصادی تعاون تنظیم (ECO) کے سربراہی اجلاس میں شرکت کے لیے دو روزہ سرکاری دورے پر موجود ہیں۔

فوزولی انٹرنیشنل ایئرپورٹ پر وزیراعظم اور ان کے ہمراہ وفد کا پرتپاک استقبال آذربائیجان کے وزیر ثقافت عدیل کرملی، آذربائیجان میں پاکستان کے سفیر قاسم معین الدین، پاکستان میں آذربائیجان کے سفیر خضر فرہادوف اور دیگر اعلیٰ حکومتی و سفارتی حکام نے کیا۔

وزیراعظم کے ہمراہ اعلیٰ سطحی پاکستانی وفد بھی موجود ہے، جس میں نائب وزیراعظم و وزیر خارجہ سینیٹر محمد اسحاق ڈار، وفاقی وزیر اطلاعات و نشریات عطااللہ تارڑ اور وزیراعظم کے معاون خصوصی طارق فاطمی شامل ہیں۔

دورے کے دوران وزیراعظم شہباز شریف خان کندی میں منعقدہ ECO سربراہی اجلاس سے خطاب کریں گے، جہاں وہ رکن ممالک کے درمیان تجارتی، علاقائی روابط اور باہمی تعاون کو فروغ دینے سے متعلق پاکستان کا مؤقف اور وژن پیش کریں گے۔

وزیراعظم اجلاس کے موقع پر دیگر عالمی رہنماؤں سے دوطرفہ ملاقاتیں بھی کریں گے، جن کا مقصد پاکستان کے سفارتی روابط کو مزید مضبوط بنانا اور ECO خطے میں اقتصادی شراکت داری کو فروغ دینا ہے۔