چونگ چھنگ، جمعرات، 3 جولائی 2025 (ڈبلیو این پی): پاکستان نے شنگھائی تعاون تنظیم (SCO) کے تحت چین کے جنوب مغربی شہر چونگ چھنگ کے ضلع یونگ چھوان میں 3 سے 7 جولائی تک جاری فلم فیسٹیول میں اپنی پانچ منتخب فلموں کے ذریعے ملک کی ثقافتی اور تخلیقی صلاحیتوں کا بھرپور مظاہرہ کیا ہے۔

افتتاحی تقریب سے خطاب کرتے ہوئے وزیر مملکت برائے تعلیم و پیشہ ورانہ تربیت وجیہہ قمر نے پاکستان کی شرکت کو ملک کے تخلیقی فن، ثقافتی ورثے اور فلمی کہانیوں کی بھرپور نمائندگی قرار دیا۔ ان کا کہنا تھا، ’’یہ فلمیں صرف فن پارے نہیں بلکہ پاکستانی عوام کی امیدوں، جدوجہد اور خوابوں کی عکاس ہیں۔‘‘

پاکستانی فلموں کی فہرست مختلف النوع موضوعات اور اصناف پر مشتمل ہے:

• للہ یار اینڈ دی 100 فلاورز آف گاڈ (2023) – ایک اینی میٹڈ فلم جو ماحولیات سے جڑی مہم جوئی کو اجاگر کرتی ہے،
  * عمرو عیار: اے نیو بیگننگ (2024) – مشرقی دیومالائی روایات سے متاثر فینٹسی ایپک،
  * دی مارشل آرٹسٹ (2025) – عزم، نظم و ضبط اور ثقافتی ہم آہنگی پر مبنی متاثر کن کہانی۔

اس کے علاوہ دو پاکستانی فلمیں مقابلے کے حصے میں بھی شامل ہیں:

* دیمک (2025) – ایک سماجی شعور پر مبنی ڈرامہ جو موجودہ مسائل پر روشنی ڈالتا ہے،
* نیاب (2024) – حوصلے، جستجو اور کامیابی کی جدوجہد پر مبنی داستان۔

وجیہہ قمر نے پاکستان اور چین کے درمیان گہرے اور دیرینہ تعلقات پر روشنی ڈالتے ہوئے اسے "وقت کی آزمائشوں سے گزرا ہوا رشتہ” قرار دیا۔ انہوں نے کہا، ’’ہم ایک دوسرے کو ’آئرن برادرز‘ کہنا محض ایک اظہار نہیں، بلکہ باہمی اعتماد اور احترام پر مبنی شراکت داری کا عکاس ہے۔‘‘

انہوں نے اس عزم کا اعادہ بھی کیا کہ پاکستان، چین اور ایس سی او کے دیگر رکن ممالک ایک مشترکہ ثقافتی مستقبل کی تشکیل کے لیے پرعزم ہیں۔ ’’سنیما ایک طاقتور ذریعہ ہے جو مشترکہ اقدار کے فروغ اور عوامی روابط کو مستحکم کرتا ہے،‘‘ انہوں نے کہا۔

یہ فلمی میلہ چین فلم ایڈمنسٹریشن اور چونگ چھنگ میونسپل حکومت کے اشتراک سے منعقد کیا جا رہا ہے، جس کا مقصد رکن ممالک کے درمیان ثقافتی تبادلے اور علاقائی تعاون کو فروغ دینا ہے۔ فیسٹیول میں 11 بڑی سرگرمیاں شامل ہیں، جن میں فلموں کی نمائش، فورمز، فلم ٹیکنالوجی ایکسپو اور گالا کنسرٹ شامل ہیں۔

ایس سی او ممالک کی 27 فلمیں فیسٹیول میں پیش کی جا رہی ہیں، جن میں بہترین فلم، بہترین ہدایتکار سمیت دس زمروں میں ایوارڈز دیے جائیں گے۔

یونگ چھوان، جو فیسٹیول کی میزبانی کر رہا ہے، تیزی سے فلم اور ٹیلی ویژن کی صنعت کا مرکز بن چکا ہے، جہاں 100 سے زائد پروڈکشن کمپنیاں اور جدید سہولیات جیسے 3,000 مربع میٹر پر مشتمل ورچوئل پروڈکشن اسٹیج اور 5,000 مربع میٹر کا ساؤنڈ اسٹیج موجود ہیں۔