لاہور، اتوار، 1 جون 2025 (ڈبلیو این پی): صدرِ مملکت آصف علی زرداری نے اتوار کے روز پاکستان کرکٹ ٹیم کو مشورہ دیا ہے کہ وہ سیاست سے دور رہیں اور اپنی تمام تر توجہ کھیل اور اپنے کیریئر پر مرکوز رکھیں، کیونکہ سیاست ان کا میدان نہیں بلکہ سیاست دانوں کا کام ہے۔

یہ بات انہوں نے گورنر ہاؤس لاہور میں پاکستان اور بنگلہ دیش کی کرکٹ ٹیموں کے اعزاز میں دیے گئے استقبالیہ کے دوران ہلکے پھلکے انداز میں کہی۔ صدر زرداری نے کہا، "کرکٹرز کو سیاست میں نہیں پڑنا چاہیے، سیاست ہمیں کرنی ہے، جو چودہ سال جیل میں رہ سکتے ہیں۔” ان کے اس تبصرے کو پاکستان ٹیم میں مبینہ گروپنگ اور اندرونی اختلافات کے تناظر میں دیکھا جا رہا ہے۔

تقریب میں گورنر پنجاب سردار سلیم حیدر خان، چیئرمین پاکستان کرکٹ بورڈ محسن نقوی، پاکستان میں تعینات بنگلہ دیش کے ہائی کمشنر محمد اقبال حسین، بی سی بی کے کرکٹ آپریشنز کے سربراہ ناظم العابدین فہیم، چیئرمین پی سی بی کے مشیر عامر میر، دونوں ٹیموں کے عہدیداران اور کھلاڑیوں نے شرکت کی۔

صدر زرداری نے اس موقع کو کھیل کے ذریعے سفارت کاری کے فروغ کے لیے استعمال کرتے ہوئے کہا کہ پاکستان بنگلہ دیش کے ساتھ تجارت، ثقافت، کھیل اور عوامی سطح پر رابطوں سمیت ہر شعبے میں تعلقات مضبوط بنانے کا خواہاں ہے۔

انہوں نے دونوں ممالک کے ماضی کے تعلقات کا ذکر کرتے ہوئے کہا کہ نوجوان کھلاڑی شاید 1971 کی علیحدگی کے دکھ کو نہ سمجھ پائیں، لیکن ہم جیسے پرانے لوگ اس المیے کے گواہ ہیں۔ "اب وقت ہے کہ دونوں جانب کے دل جوڑے جائیں،” صدر زرداری نے مصالحت اور بھائی چارے کا واضح پیغام دیا۔

انہوں نے کرکٹ کو دنیا بھر میں لوگوں کو قریب لانے کا ذریعہ قرار دیتے ہوئے کہا، "مجھے خوشی ہے کہ آپ سب پاکستان، لاہور میں موجود ہیں۔ امید ہے کہ مستقبل میں بھی آپ کی آمد کا سلسلہ جاری رہے گا۔”

صدر زرداری نے بنگلہ دیش کے دورے کی خواہش کا بھی اظہار کیا اور کیڈٹ کالج پٹارو میں اپنے طالبعلمی کے دنوں کو یاد کرتے ہوئے بتایا کہ ان کے کئی بنگلہ دیشی دوست آج بھی ان سے رابطے میں ہیں۔

انہوں نے پاکستان اور بنگلہ دیش دونوں ٹیموں کے نوجوان کھلاڑیوں کی صلاحیتوں کو سراہتے ہوئے کہا، "دنیا جوان ہے، آپ جوان ہیں، یہ آپ کا وقت ہے۔ ہم نے اپنا وقت گزار لیا، اب آپ کی باری ہے۔ میں آپ سب کے لیے نیک تمناؤں کا اظہار کرتا ہوں۔”

آخر میں صدر زرداری نے دونوں ٹیموں کے ساتھ گروپ فوٹو بنوائے اور بنگلہ دیشی ٹیم کے عہدیداروں کو یادگاری تحائف بھی پیش کیے۔ اس موقع پر چیئرمین پی سی بی محسن نقوی نے انہیں ایک فریم شدہ قومی ٹیم کی جرسی تحفے میں دی، جس پر "آصف علی زرداری” اور نمبر "1” درج تھا۔

یہ تقریب کھیل، سفارت کاری اور تاریخ کے حسین امتزاج کی علامت بنی، جس نے کرکٹ کو خطے میں خیرسگالی اور تعلقات کے فروغ کا اہم ذریعہ ثابت کیا۔